មានរឿងតំណាលថា មានមនុស្សសួរខុងជឺថា 
បើបានគ្រប់គ្រងប្រទេសជាតិតើគាត់នឹងដោះស្រាយក្នុងរឿងអ្វីមុនគេ? ខុងជឺឆ្លើយតបថា នឹងដោះស្រាយរឿងភាសាឲ្យត្រឹមត្រូវមុនគេ។ អ្នកសួរចម្លែកចិត្ត ទើបសូមឲ្យខុងជឺអធិប្បាយ ខុងជឺក៏អធិប្បាយថា៖
“បើភាសាមិនត្រឹមត្រូវ រឿងដែលមនុស្សនាំគ្នានិយាយក៏នឹងមិនត្រូវត្រង់ជាមួយនឹងអ្វីដែលគេចង់ឲ្យអ្នកដទៃយល់។ បើមនុស្សមិនយល់ត្រូវត្រង់តាមអ្វីដែលគេនិយាយគ្នា រឿងដែលគួរនឹងធ្វើបានស្រេចបាច់រៀបរយ ក៏នឹងធ្វើមិនសម្រេច សុជីវធម៌ហើយនឹងសិល្បៈទាំងឡាយក៏នឹងអន់ថយចុះ។ ភាពយុត្តិធម៌ក៏នឹងល្អៀង កាលណាភាពយុត្តិធម៌ល្អៀង ប្រជាជនក៏នឹងច្របូកច្របល់ផងដែរដោយសារគ្មានអ្វីជាទីពឹង ព្រោះថាកាលបើសម្តីមិនត្រឹមត្រូវទៅហើយ តើនឹងប្រកាន់យកអ្វីជារឿងដែលត្រឹមត្រូវបានទៀត? រឿងភាសាទើបជារឿងដែលសំខាន់ក្រៃលែងជាងរឿងអ្វីៗទាំងអស់។”
នេះគឺជាភាពសំខាន់របស់ភាសា ដែលខុងជឺបានអធិប្បាយយ៉ាងខ្លីៗ តែក៏អាចមើលឃើញនិងអាចយល់បានដោយងាយ បើយើងចង់ក្លាយជាមនុស្សដែលមានគោលការច្បាស់លាស់ជាទីគោរពរាប់អានរបស់មនុស្សទាំងឡាយ ក៏ចូរព្យាយាមប្រើភាសាឲ្យត្រឹមត្រូវ។
នូ ចំណាន
ថ្នាលគំនិត 